November 17, 2023

T.G

ደጋግሜ እንደምለው ጊዜንና ሁኔታን ያገናዘበ እስከሆነ ድረስ እንኳንስ ቤተ እምነት የተለያየ አገግልግሎት የሚሰጡ ሌሎች ተቋሞችም ቢሠሩና ቢስፋፉ ቅሬታ የሚኖረው ባለጤናማ አእምሮ ሰው የሚኖር አይመስለኝም።

 የአገራችን ህዝብ ለማመን ቀርቶ ለማሰብም በሚከብድ መከራና ሰቆቃ ውስጥ ሆኖ የባእዳንን ነፍስ አድን ምፅዋእት እየተማፀነ ባለበት በዚህ ወቅት ፉክክር በሚመስል አኳኋን በየባህር ማዶ ቤተ ክርስቲያን ወይም ገዳም ለማሠራት በሚል ዘመቻ ላይ መጠመድ ማሳዘን ብቻ ሳይሆን ህሊናን ይፈታተናል።

በእውነት ምኑ ነካን? ምነው አእምሯችን የትኛው ከየትኛው መቅድም እንዳለበት ማመዛዘን አቃተው? እውን በዚህ አይነት እኛነት የሚሠራን ቤተ እምነት ወይም ገዳም (ያውም ባህር ማዶ) ባርኮ የሚቀበልና ማደሪያው የሚያደርግ እውነተኛ አምላክ ይኖራል እንዴ? ወዘተ የሚሉ እጅግ ፈታኝ ጥያቂዎችን ያስነሳል።

ክርስቶስ ቃልን ከተግባር ጋር በማዋሃድ ጨካኝ ገዥዎችን እየገሰፀ እና በራሱም ደካማነት ሲሰቃይ የነበረውን ሰብአዊ ፍጡር እያፅናና እና እያስተማረ አሳየን እንጅ በሌለ አቅማችሁ ህንፃ ካልገነባችሁልኝና ካላስዋባችሁልኝ መንግሥተ ሰማያትን አትወርሷትም በሚል ዘመቻ ወርቃማ ጊዜውንና አስተምህሮቱን አላባከነም።  

እናንተ የዘመናችን የሃይማኖት መሪዎችና ሰባኪዎች ግን በጨካኝ የጎሳ አጥንት ስሌት ፖለቲካ ገዥዎች ምክንያት ታይቶና ተሰምቶ በማይታወቅ መጠንና አይነት መከራና ሰቆቃ እየተገረፉ ከሚገኙ አያሌ ሚሊዮን ንፁሃን በተለይም ህፃናት፣ ወላጆች፣ አቅመ ዳካሞች ፣ ወዘተ ጉሮሮ ላይ እየነጠቃችሁ ወይም እየተሻማችሁ የእግዚአብሔርን ቤት እናሠራለን የሚል ዘመቻ ላይ ከተጠመዳችሁ ሰነበታችሁ።

ከቶ ጊዜ የማይሰጥ  ትኩረትና ርብርብ የሚጠይቀውን  የወገን ጩኸትና ጥሪ እንደሌለ ቆጥሮ ወይም ችላ ብሎ ወይም  በሌላ የዘመቻው አቀንቃኞች በሚያውቁት ምክንያት (ulterior motive)  የሚሠራን ቤት ክርስቲያን ማደሪያው የሚያደርግ እውነተኛ አምላክ እንደሌለና እንደማይኖር ለመረዳትና ለመናገር ነብይና የሃይማኖት ሊቅ መሆንን አይጠይቅም። የሚጠይቀው የሚዛናዊና የቅን ህሊና ባለቤትነት ሆኖ መገኘትን ብቻ ነው!

ከሁሉም የሚያሳዝነውና የሚያሳፍረው አገረ እግዚአብሔር የምንላት አገር ምድረ ሲኦል ለሆነችባቸው በአየሌ ሚሊዮኖች የሚቆጠሩ ንፁሃን አማኝ ወገኖች በቅድሚያ ቅድሚያ ርብርብ እንድረስላቸው፤ አገር መኖሪያ እንጅ የመቃብር እና የቁም ሙት መናኸሪያ ሆናለችና ከዚህ ሰብሮ ለመውጣት  የፈጣሪን ድጋፍ እየተማፀን የምንችለውን አስተዋፅኦ ሁሉ እናድርግ ፤ የባህር ማዶውን የቤተ እምነት ግንባታ ዘመቻ ለጊዜው እናቆየው የሚል የሃይማኖት አባት ወይም መሪ ለማግኘት አለመታደላችን ነው።

 ባለጌና ጨካኝ ገዥዎች አደንቁረው የሚገዙት አልበቃው ያለ ይመስል የሃይማኖት መሪዎችና አስተማሪዎች ነን የሚሉትም  ቃልን ከተግባር ጋር በሚያዋህድ አርአያነት ሃላፊነታቸውንና ተልእኳቸውን ለመወጣት ተስኗቸው  በፈጣሪ ስም እየማሉና እየተገዘቱ ሲያደነቁሩት መታዘብ የእውነተኛ አማኝ ህሊናን በእጅጉ ይፈታተናል።

አዎ! በእውነት ስለ እውነት ከተነጋገርን በጥቅም ወይም በፍርሃት ወይም በአድርባይነት ከባለጌና ጨካኝ የጎሳ አጥንት ስሌት ፖለቲካ ቁማርተኞች ጋር እየተሻሹ   ሃይማኖቱን ተረት ተረት እያስመሰሉት ነውና ከምር መናገርና መነጋገር ግድ ይለናል።  የመናገሪያውና የመነጋገሪያው ወቅትና ሁኔታ ደግሞ ነገ ሳይሆን ዛሬ ነው። አዎ! አግባብነት ያለው እስከሆነ ድረስ አካፋንን አካፋ ለማለት  ( to call it as it is ) መሽኮርመሙ ይብቃን! እውነተኛው አምላክ የሚወደውም ይህንኑ እንጅ የሰበብ ድሪቶ እየደረቱና ዙሪያውን እየዞሩ መስሎና አስመስሎ መኖር አይደለም!

የመከረኛውን ወገን የደም ጎርፍን፣የደም እንባን፣ የርሃብና የጥማት ሰደድን፣ የርዛት ብርታትን፣ የጤና መቃወስን፣ የሥነ ልቦና ስብራትን፣ የሞራል ድቀትን፣ እና በአጠቃላይ ከሰብአዊ ፍጡራን በታች የሚያደርግ ተመፅዋዕኝነትን፣ ወዘተ ችላ ብሎ ወይም  ወደ ኋላ ወይም ወደ ጎን ገፍቶ የሚሠራ ቤተ ክርስቲያን ወይም ገዳም በወርቅ ቢሠራም እውነተኛው አምላክ ይፀየፈዋል እንጅ ፈፅሞ አይቀበለውም።

 
https://amharic-zehabesha.com/archives/187133